Bann teren ek lanmar kotyer konman bann lekosistenm kle pour obtenir en klima an bonn sante

Pandan ki bann dirizan i aziste bann polisi ekonomik pou adres sitiasyon avek pandemik COVID-19, i vin pli neseser pour fer sir ki sa bann mezir i alinyen avek bann langazman enternasyonal onivo klimatik – osi koni koman bann kontribisyon anba lagreman Pari ki’n ganny determinen lo nivo nasyonal (Nationally Determined Contributions/NDC).  Si nou met lanatir o sant nou bann zefor restorasyon, nou kapab ed bann Gouvernman rebatir zot lekonomi, lasosyete e bann lekosistenm dan en fason pli soutenab.

Pli spesifikman, bann pei i devret met plis lanfaz lo proteksyon ek/ouswa restorasyon bann teren ou lanmar kotyer- bann labita tel ki mangliye/lanbousir, bann teren kotyer inonde kot ki i annan vezetasyon, ek bann zerb ki pous dan delo sale, ki ofer en gran varyete benefis pour popilasyon e pour plannet. Sa bann lekosistenm i kapab ed bann pei pour ranforsi zot lekonomi,  amelyor lavi ek mwayen viv zot pep,  protez zot biodiversite e ede pour realiz bann langazman enternasyonal onivo klimatik.

Bann teren ek lanmar kotyer i ofer proteksyon kont bann tanpet, zot filtre delo, zot soutenir biodiversite e zot stor sifizaman karbonn. Tousala i demontre ki manyer bann mezir natirel i kapab ed nou pour rekipere dan en fason soutenab e efikas. Lanimasyon anler i ilistre valer imans sa bann lekosistenm.

Nesesite pour protez e envestir dan sa bann lekosistenm i ganny anplifye par sa lavites alarman ki zot pe disparet: 50% teren e lanmar kotyer dan lemonn in disparet dan sa dernyen 100 an.

Konesans siyantifik lo benefis ki teren e lanmar kotyer i anmennen in byen ganny etabli -  annefe, i ganny servi konman en baz gidans par sa platform entergouvernmantal lo sanzman klima.

Sa i en baz solid pour bann pei ransforsi zot bann zefor an sa ki konsern proteksyon dan kad mitigasyon dan zot prosen NDC. Deplis, teren e lanmar kotyer i kapab asir en plas enportan anba bann konponan adaptasyon e rezilyans ki ganny konsidere dan NDC, an prenan kont sa gran varyete servis lekosistenm ek proteksyon ki zot ofer bann kominote ensi ki bann plant ek zannimo.

Pour siport sa bann zefor, Pew ek son bann partener pe travay aktivman avek plizyer Gouvernman e partener endepandan dan Belize, Costa Rica ek Sesel- bann pei kin  eksprim sa lanbisyon pour amelyor proteksyon bann teren e lanmar kotyer dan zot prosenn NDC. Pew i aplodi sa bon gouvernans par sa bann pei e ankouraz lezot pour fer bann langazman parey pour byennet zot popilasyon, zot lekonomi e pour lanvironnman lo en nivo global.