Zefor lokal par Sesel pour nonm bann zerb lanmer/gomon zerb i siport zefor konservasyon

Bann laplenn zerb lanmer Sesel i tre enportan pour dimoun osi byen ki lanatir.  Bann marekaz lo lakot i en sours nouritir e en berso pour plizyer lespes maren tel ki pwason, torti ek envertebre; zot ede ranforsi bann lakot fas a radmare; e zot blok karbonn. Potansyel sa lekosistenm dan adaptasyon ek rediksyon lefe sanzman klima in motiv gouvernman Sesel pour angaz li pour protez 100% zerb lanmer Sesel avan 2030, dan kad son kontribisyon nasyonal vizavi Lakor Pari. 

Ozordi, dan kad kontinyasyon selebrasyon mwan Mars koman Mwan Sansibilizasyon lo Zerb Lanmer, Sesel in ofisyelman azout bann non zerb lanmer dan lalang Kreol Seselwa, son lalang maternel.  Fon pour Konservasyon ek Adaptasyon Klimatik Sesel (SeyCCAT) in rod sizesyon piblik e swivan vot popiler par bann sitwayen ki ti apre ganny valide par bann eksper, “zerb lanmer” ek “gomon zerb” ti ganny adopte koman bann apelasyon Kreol Seselwa pour zerb lanmer. Sa kanpanny partisipasyon piblik par SeyCCAT in osi abouti dan bann non lokal pour sa senk lespes zerb lanmer prensipal, enkli bann lespes ki annan bann karakteristik sanblab- ki trouve Sesel. 

Proze Resansman Zerb lanmer ek Evalyasyon Karbonn

Devlopman bann term lokal pour zerb lanmer i non selman ede ogmant konesans, me i osi ede ranforsi konservasyon.    

Flavien Joubert, Minis pour Lanvironnman, Lagrikiltir ek Sanzman Klima ti eksprimen ki “Pour nou, lefe ki nou annan bann non Kreol ofisyel pour zerb lanmer ek tou son lespes, i ranforsi nou dezir pour fer tou dimoun pa zis konpran e apresye zerb lanmer, me zot osi santi sa lobligasyon pour zwe en rol dan son konservasyon.” .

Sa travay pour devlop bann non lokal inik pour zerb lanmer ti komans dan kad Proze SeyCCAT pour Marekaz Kotye ek Sanzman Klima, pour ogmant konesans lo lenportans zerb lanmer.  A sa moman SeyCCAT ti rekonnet ki ti napa en non spesifik pour sa lekosistenm; istorikman, mo ”gomon” ti pe ganny servi pour idantifye zerb lanmer osi byen ki alg.   An rezilta sa, SeyCCAT ti lans en kanpanny nasyonal pour idantifye bann non Kreol pour zerb lanmer ek bann lezot lespes sanblab dan lanmer Sesel. 

Jeanne Mortimer

SeyCCAT ti servi rezo sosyal, progranm radyo ek bann prezantasyon dan kominote pour ankouraz piblik pour partisip dan idantifikasyon bann non Kreol pour zerb lanmer.  Kominote peser, ki tre familye avek labita zerb lanmer, in zwe en rol kle dan sa bann zefor sansibilizasyon.  Apre ki i ti’n kolekte bann sizesyon piblik e demann Seselwa pour vot pour sa ki zot prefere, SeyCCAT ti soumet en lalis non avek en Komite syantis ek lengwis ki ti retenir zis bann ki ti pli relevan.  Lakademi Kreol Sesel, ki avan sa ti Lenstiti Kreol ti adopte sa bann apelasyon koman bann non ofisyel e standar.

Jeanne A. Mortimer, Syantis konsiltan pour SeyCCAT ti eksplike ki “Zerb lanmer Sesel i enkli en douzenn lespes ki tonm dan senk kategori tre distenktif.” Me tradisyonnelman, mazorite Seselwa pa fer distenksyon ant zerb lanmer ek alg. Vi ki nou’n trouve ki trwa dan sa senk lespes ti napa non Kreol, nou’n envit piblik pour nonm zot e apre vot pour zot non prefere parmi bann sizesyon.  Nou krwar ki sa proze SeyCCAT pa zis ogmant konesans, me in osi devlop en sans lapartenans pour zerb lanmer parmi Seselwa.  

Jeanne Mortimer

Bann non zerb lanmer an Kreol Seselwa ansanm avek zot definisyon, pou paret dan prosen edisyon Diksyoner Kreol Seselwa. 

Apard ed Seselwa pour pli byen konpran e apresye sa lekosistenm tre enportan, ladopsyon bann non lokal pour zerb lanmer i anliny avek en rekonesans global ki pe deplizanpli ogmante, lo lenportans lanatir pour byennet imen.    Konservasyon zerb lanmer i zwe en rol kle dan konba kont sanzman klima, an term rediksyon osi byen ki adaptasyon.  Par soutenir biodiversite, siport sibzistans e retir karbonn dan bann losean, zerb lanmer i anmenn en solisyon natirel pour sanzman klima e i tre enportan pour bann kominote lemonn an antye.  Parey M. Joubert ti fer sorti “Koman en pti leta zil, nou bezwen tou nou lekosistenm pour fonksyonn avek lefikasite pour ki nou pep, ozordi e demen, i kapab kontinyen benefisye avek zot servis pandan bann lannen ki pe vini.”

Stacy Baez i travay lo bann proze  The Pew Charitable Trusts pour proteksyon bann marekaz kotye ek resif koray.